အောက်တိုဘာ ၁၃၊ ၂၀၂၅
Shy V (VOM)
ရှမ်းပြည်နယ်မြောက်ပိုင်း၊ ကုန်သွယ်ရာ လမ်းပေါ်ရှိ ကျောက်မဲခရိုင်၊ သီပေါမြို့ကို ဦးတည်နေတဲ့ နလအ စစ်ကြောင်းတွေဟာ လက်ရှိမှာတော့ လောင်ခွန်ရွာ အထိ ရောက်ရှိလာကြောင်းဒေသခံတွေဆီက သိရပါတယ်။
“တိုက်ပွဲက ကျောက်မဲနဲ့ သီပေါကြား ရေပူရွာ အကျော် လောင်ခွန်ရွာကို ရောက်နေပါပြီ။ စစ်ကြောင်း ထိုးလာတဲ့ အနေအထားက ပုံမှန်ပါပဲ” လို့ ဒေသခံ တယောက်က ပြောပါတယ်။
လောင်ခွန်ရွာက ကျင်သီတံတားနဲ့ နီးပြီး ကျောက်မဲ နဲ့ သီပေါ ကလည်းကားမောင်း ရင်တောင် တနာရီ ဝန်းကျင်သာ ကြာတဲ့ အကွာအဝေးဖြစ်တယ်လို့ ဆိုပါတယ်။
“စစ်ကြောင်းက သီပေါနဲ့ ရှစ်မိုင်အကျော်၊ ဘော်ကြို နဲ့ နှစ်မိုင်ကျော်ခန့်ဝေးတဲ့ ကျင်သီတံတား အနီး ရောက်ရှိနေပြီ” လို့ နလအ တပ်ဖွဲ့နဲ့ နီးစပ်သူ တယောက်က ပြောပါတယ်။
ကျောက်မဲ မြို့နယ်ရဲ့ အစွန် ဖြစ်တဲ့ ကျောက်မဲ – သီပေါကြား လမ်းမဘေးက နောင်အန်းရွာကိုတော့ အရင်နေ့ အောက်တိုဘာလ ၁၀ ရက်နေ့က နလအ တပ်ဖွဲ့က ပြန်လည် ထိန်းချုပ် လိုက်တယ်လို့ ဆိုပါတယ်။
တိုက်ပွဲက သီပေါနဲ့ နီးကပ်လာတာကြောင့် သမိုင်းဝင် ရှေးဟောင်း အမွေအနှစ် ဖြစ်တဲ့ ဘော်ကြိုဘုရားကြီး စေတီတော်နဲ့ ကျောင်းဆောင်တွေကို မပျက်မစီး ရလေအောင် သက်ဆိုင်ရာမှ ဝိုင်းဝန်းထိန်းသိမ်းပေးကြဖို့ ဘော်ကြိုကျောင်းတိုက် ဆရာတော်က မေတ္တာရပ်ခံစာ ရေးသားထားသလို ဘော်ကြို ဘုရားကြီးကျောင်းဝင်းအတွင်း သက်ကြီး ရွယ်အိုတွေနဲ့ ဆရာတော် သံဃာတွေတွေ ခိုလှုံနေကြောင်း ဌာနဆိုင်ရာ အဖွဲ့အစည်းဆွေကို မေတ္တာရပ်ခံ အသိပေး ရေးသားထားပါတယ်။
သီပေါမြိုနယ်၊ ဘော်ကြိုဘုရား ပရဝုဏ်အတွင်း မည့်သည့် လက်နက်ကိုင် အဖွဲအစည်းဝင်မှ မရှိနေသလို ဘုရားစိန်ဖူးတော်လည်း ပျောက်ဆုံးခြင်း မရှိကြောင်း၊ သတင်းတု၊ သတင်းအမှားတွေ ဖြန့်ဝေခြင်း မပြကြဖို့လည်း မေတ္တာရပ်ခံထားကြောင်း ဒေသခံတွေဆီက သိရပါတယ်။
ယမန်နေ့ အောက်တိုဘာလ ၁၂ ရက်နေ့ ညနေ ၅ နာရီကျော်ခန့်က ကျောက်မဲမြို့နယ်၊ မိုင်းလုံမြို့နယ်ခွဲ၊ လည်ကြီးရွာကို ဂျက်ဖိုက်တာနဲ့ ဗုံးကြဲတိုက်ခိုက်ခံရသလို ပစ္းရွာဘက်မှာလည်း လေကြောင်းတိုက်ခိုက်ခံကာ နေအိမ် တချို့ ထိခိုက်ပျက်စီးခဲကြောင်း TNLA ဘက်က သတင်းထုတ်ပြန်ထားပါတယ်။
Photo: Goole /ဒေသခံ
